NextGenerationEU: L-iżborżi permezz tal-Faċilità għall-Irkupru u r-Reżiljenza jaqbżu l-EUR 150 biljun

Wara l-pagament tal-lum ta' EUR 6 biljun lil Spanja, il-Kummissjoni issa ħarġet aktar minn EUR 150 biljun għall-Istati Membri permezz tal-Faċilità għall-Irkupru u r-Reżiljenza (RRF, Recovery and Resilience Facility).

Dan huwa stadju importanti fl-implimentazzjoni tal-RRF, l-istrument ewlieni fil-qalba tal-pjan ta' rkupru NextGenerationEU għall-Ewropa, li jikkonsisti fi EUR 800 biljun. Fi ftit aktar minn sentejn tal-eżistenza tagħha, l-RRF kienet qed tmexxi r-riformi u l-investimenti trasformattivi fl-Istati Membri tal-UE kollha, tħaffef it-tranżizzjonijiet ekoloġiċi u diġitali u żżid ir-reżiljenza ġenerali tal-Unjoni.

Hekk kif l-implimentazzjoni tal-RRF tibqa' għaddejja b'ħeffa kbira, illum il-Kummissjoni nediet mappa online interattiva li turi l-proġetti appoġġati mill-RRF u implimentati fuq il-post mill-Istati Membri. Il-mappa se tikkontribwixxi biex tkompli tiżdied it-trasparenza dwar il-funzjonament tal-Faċilità għall-Irkupru u r-Reżiljenza u dwar l-impatt tanġibbli tagħha għaċ-ċittadini, in-negozji u s-soċjetà ċivili tal-UE.

Lejn immappjar komprensiv tal-proġetti tal-RRF

Il-mappa se tiġi aġġornata regolarment hekk kif informazzjoni ġdida tkun disponibbli. Dan jippermetti li kulħadd jista' jagħmel “żjara virtwali” biex jara l-implimentazzjoni tal-pjanijiet nazzjonali għall-irkupru u r-reżiljenza tal-Istati Membri.

Il-mappa tipprovdi ħarsa ġenerali tar-riformi u l-investimenti magħżula li huma appoġġati mill-RRF:

• Hija tindika l-pożizzjoni ġeografika tagħhom fl-Istati Membri u tagħti informazzjoni dwar is-sitwazzjoni attwali tagħhom, jiġifieri deskrizzjoni qasira tal-istat ta' progress fl-implimentazzjoni tagħhom, kif ukoll tal-passi relatati li jmiss tagħhom.
• Tipprovdi aċċess għal informazzjoni aktar dettaljata dwar il-proġetti fil-paġni tal-pajjiżi tas-sit web tal-Faċilità għall-Irkupru u r-Reżiljenza, u dwar riżorsi online oħra, bħas-siti web dwar il-pjanijiet nazzjonali għall-irkupru u, fejn disponibbli, siti web dwar proġetti speċifiċi ffinanzjati mill-RRF.

Skont l-RRF, l-Istati Membri jirċievu finanzjament malli jitlestew b'suċċess l-istadji importanti u l-miri miftiehma minn qabel, li jikkorrispondu għal stadji differenti fl-implimentazzjoni tar-riformi u l-investimenti. Madankollu, l-inklużjoni ta' riforma jew investiment speċifiku fuq il-mappa mhux neċessarjament timplika li l-Istat Membru diġà rċieva l-finanzjament mill-RRF relatat ma' dak il-proġett (jista' jkun, pereżempju, li Stat Membru jkun diġà beda jimplimenta proġett b'finanzjament nazzjonali). Il-mappa hija wkoll mingħajr preġudizzju għal kwalunkwe valutazzjoni futura mill-Kummissjoni dwar it-twettiq tal-istadji importanti jew il-miri sottostanti għal kwalunkwe proġett partikolari.

Aktar minn 350 proġett tal-RRF diġà ddaħħlu fil-mappa

Il-mappa se tgħin lill-utenti jesploraw aktar minn 100 riforma li l-Istati Membri implimentaw jew qed jimplimentaw bħala parti mill-pjanijiet tagħhom għall-irkupru u r-reżiljenza, bħall-introduzzjoni minn Spanja ta' taxxa ġdida fuq l-imballaġġ tal-plastik li jintuża darba biss, is-simplifikazzjoni tal-proċeduri ta' liċenzjar biex jiġu installati sorsi ta' enerġija rinnovabbli fil-Greċja jew ir-riforma kontra l-korruzzjoni fil-Kroazja. L-istess jgħodd għal aktar minn 250 investiment li bħalissa huma inklużi fil-mappa, bħat-tnedija tal-proċedura ta' akkwist għas-sistema tat-trasport f'Riga (il-Latvja), l-introduzzjoni ta' biljett b'rata fissa għal staġun biex jiġi ffaċilitat it-trasport pubbliku sostenibbli fl-Awstrija, jew it-tlestija tax-xogħlijiet għar-riġenerazzjoni tal-viċinat fis-Slovenja.

Il-proġetti li jidhru fuq il-mappa ntgħażlu abbażi tal-istat ta' implimentazzjoni miksub tagħhom. Il-mappa tikkomplementa u tibni fuq l-informazzjoni li l-Istati Membri ħarġu għall-pubbliku, li huma responsabbli mill-implimentazzjoni u l-monitoraġġ tal-pjanijiet nazzjonali tagħhom għall-irkupru u r-reżiljenza. L-implimentazzjoni tal-RRF għadha għaddejja, li jfisser li xi proġetti li se jirċievu finanzjament mill-RRF għad iridu jiġu definiti. Għalhekk, il-mappa ma għandhiex l-għan li tipprovdi ħarsa ġenerali eżawrijenti tal-proġetti ffinanzjati mill-RRF.

Il-passi li jmiss

Hekk kif l-implimentazzjoni tal-pjanijiet nazzjonali għall-irkupru u r-reżiljenza timxi 'l quddiem, u hekk kif il-Kummissjoni tikseb informazzjoni ġdida dwar l-avvanz tal-proġetti marbutin mar-riformi u l-investimenti mill-Istati Membri, b'mod partikolari bis-saħħa tal-informazzjoni ppreżentata fil-kuntest tat-talbiet għal pagament, il-mappa se tkun regolarment aġġornata.

Il-mappa se tinkorpora wkoll informazzjoni dwar il-100 benefiċjarju prinċipali aħħari tal-finanzjament tal-RRF għal kull pjan nazzjonali, meta din tkun disponibbli aktar tard din is-sena.

Informazzjoni ġenerali

L-implimentazzjoni tal-RRF u t-twettiq effiċjenti tal-objettivi tagħha jirrikjedu livell għoli ta' trasparenza dwar il-funzjonament tagħha u dwar l-użu konkret tal-finanzjament tal-RRF mill-Istati Membri.

Il-Kummissjoni, biex tiżgura t-trasparenza, tippubblika regolarment informazzjoni fuq is-sit web iddedikat apposta għall-Faċilità għall-Irkupru u r-Reżiljenza u stabbiliet it-Tabella ta' Valutazzjoni għall-Irkupru u r-Reżiljenza, li tipprovdi informazzjoni aġġornata regolarment dwar l-iżborżi u l-progress li jkun sar mill-Istati Membri.

Ir-Regolament REPowerEU kompla jżid it-trasparenza billi jirrikjedi li l-Istati Membri jistabbilixxu portal pubbliku faċli biex jintuża li jkun fih data dwar il-100 benefiċjarju finali li jirċievu l-ogħla ammont ta' finanzjament mill-RRF. L-Istati Membri se jkunu meħtieġa jaġġornaw il-portal tagħhom stess mill-inqas darbtejn fis-sena.