L-Istrateġija 2.0 dwar id-Droni: Il-ħolqien ta' suq Ewropew tad-droni fuq skala kbira

L-Istrateġija Ewropea 2.0 dwar id-Droni, li ġiet adottata llum mill-Kummissjoni, tistabbilixxi viżjoni għall-iżvilupp ulterjuri tas-suq Ewropew tad-droni. Tibni fuq il-qafas tal-UE dwar is-sikurezza għat-tħaddim u l-istabbiliment tar-rekwiżiti tekniċi tad-droni, li huwa l-aktar wieħed avvanzat fid-dinja. L-istrateġija l-ġdida tistabbilixxi kif l-Ewropa tista' twettaq operazzjonijiet kummerċjali tad-droni fuq skala kbira filwaqt li toffri opportunitajiet ġodda fis-settur.

Minn impjiegi għal soluzzjonijiet ġodda ta' mobbiltà

Bis-saħħa tal-qafas regolatorju komprensiv tal-UE, id-droni ilhom itiru b'mod sikur għal mijiet ta' eluf ta' sigħat fl-ajru tal-Ewropa, pereżempju għall-istħarriġ tal-infrastruttura, il-monitoraġġ tat-tixrid taż-żejt, jew it-teħid ta' kampjuni tal-ħamrija. Proġetti dwar l-użu ta' droni għal kunsinni mediċi bl-ajru, it-trasport ta' kampjuni mediċi bejn is-servizzi tal-kura tas-saħħa wkoll qed jagħmlu progress tajjeb. L-implimentazzjoni tal-“U-space”, sistema Ewropea unika fid-dinja għall-ġestjoni tat-traffiku tad-droni b'mod sikur, f'Jannar 2023, se twitti t-triq għal aktar operazzjonijiet.

Qabel ma tkompli miexja 'l quddiem b'dawn it-teknoloġiji innovattivi, il-Kummissjoni trid tiżgura li s-soċjetà tappoġġa d-droni. Biex tindirizza t-tħassib dwar l-istorbju, is-sikurezza u l-privatezza, l-Istrateġija għalhekk titlob li l-muniċipalitajiet nazzjonali, reġjonali u lokali jiżguraw li s-servizzi tad-droni jkunu allinjati mal-bżonnijiet taċ-ċittadini.

L-Istrateġija tipprevedi li dawn is-servizzi tad-droni li ġejjin se jsiru parti mill-ħajja Ewropea sal-2030:

1. Servizzi ta' emerġenza, immappjar, immaġnijiet, spezzjoni u sorveljanza fl-oqsfa legali applikabbi minn droni għal użu ċivili, kif ukoll it-twassil urġenti ta' kunsinni żgħar, bħal kampjuni bijoloġiċi jew mediċini.
2. Servizzi innovattivi ta' Mobbiltà bl-Ajru, bħat-taxis tal-ajru, li jipprovdu servizzi ta' trasport regolari għall-passiġġieri, inizjalment bi bdot abbord, iżda bl-għan aħħari li l-operazzjonijiet jiġu awtomatizzati bis-sħiħ.

L-isfruttar tal-potenzjal tas-suq u tas-servizzi tad-droni tal-UE jirrikjedi l-identifikazzjoni ta' elementi kostitwenti kritiċi tat-teknoloġija, bħall-intelliġenza artifiċjali, ir-robotika, is-semikondutturi u s-servizzi spazjali tal-UE u t-telekomunikazzjoni mobbli. Dan se jgħin lill-UE tibni settur innovattiv u kompetittiv tad-droni, u b'hekk tnaqqas id-dipendenzi strateġiċi.

L-istrateġija tidentifika wkoll oqsma għal sinerġiji bejn id-droni għal użu ċivili u droni tad-difiża, u għal aktar kapaċitajiet kontra d-droni u ta' reżiljenza tas-sistema.

19-il azzjoni għas-suq tad-droni tal-futur

Il-Kummissjoni issa se tniedi ħidma fuq id-19-il azzjoni ewlenija operazzjonali, teknika u finanzjarja tal-Istrateġija biex tibni l-ambjent regolatorju u kummerċjali t-tajjeb għall-ispazju tal-ajru u s-suq tad-droni tal-futur:

1. L-adozzjoni ta' regoli komuni għall-ajrunavigabbiltà, u rekwiżiti ġodda ta' taħriġ għall-bdoti tal-inġenji tal-ajru mill-bogħod u eVTOL (inġenji tal-ajru elettriċi b'ekwipaġġ ta' Tlugħ u Nżul Vertikali).
2. Il-finanzjament tal-ħolqien ta' pjattaforma online biex jiġu appoġġati l-partijiet ikkonċernati lokali u l-industrija li jimplimentaw Mobbiltà tal-Ajru Innovattiva sostenibbli.
3. L-iżvilupp ta' Pjan Direzzjonali Strateġiku għat-Teknoloġija tad-Droni biex jiġu identifikati oqsma ta' prijorità għar-riċerka u l-innovazzjoni, biex jitnaqqsu d-dipendenzi strateġiċi eżistenti u jiġu evitati oħrajn ġodda.
4. Id-definizzjoni ta' kriterji għal tikketta volontarja tad-droni approvata miċ-ċibersigurtà.

Din il-ħidma se twitti t-triq għal operazzjonijiet kummerċjali fuq skala kbira u tiżgura li l-Ewropa tibbenefika minn sinerġiji bejn l-użu ċivili, tas-sigurtà u militari tad-droni u tat-teknoloġiji relatati, inklużi soluzzjonijiet kontra d-droni.

Informazzjoni ġenerali

L-Istrateġija Komprensiva tal-Kummissjoni għal Mobilità Sostenibbli u Intelliġenti ħabbret it-tħejjija ta' Strateġija Ewropea aġġornata dwar id-Droni sa tmiem l-2022. Din il-Komunikazzjoni hija akkumpanjata minn Dokument ta' Ħidma tal-Persunal li jivvaluta l-isfidi ffaċċjati mill-industrija tad-droni, kif ukoll mill-analiżi u d-data li jirfdu l-Istrateġija 2.0 ġdida dwar id-Droni.

Il-Kummissjoni ilha mill-2014 tibni s-sisien ta' politika komprensiva tal-UE dwar id-droni. Ir-Regolament ta' Implimentazzjoni tal-Kummissjoni 2019/947 u r-Regolament Delegat tal-Kummissjoni 2019/945 fihom regoli u proċeduri dettaljati għat-tħaddim ta' inġenji tal-ajru mingħajr bdot abbord, u jistabbilixxu r-rekwiżiti għad-disinn u l-manifattura ta' sistemi ta' inġenji tal-ajru mingħajr bdot abbord. Mill-2003, l-UE investiet kważi € 980 miljun fl-iżvilupp jew l-użu ta' droni għal applikazzjonijiet innovattivi. Iffinanzjat 320 proġett relatat mad-droni bħala parti mill-programmi tagħha ta' riċerka u innovazzjoni.

Għal Aktar Informazzjoni

Mistoqsijiet u Tweġibiet

Dokument ta' Ħidma tal-Persunal

L-Istrateġija Ewropea 2.0 dwar id-Droni