Jitħabbru r-rebbieħa tal-konkors tat-traduzzjoni tal-UE tal-2024 “Juvenes Translatores”

Il-Kummissjoni Ewropea llum tħabbar is-27 rebbieħ tat-18-il edizzjoni tal-konkors tagħha tat-traduzzjoni tal-UE għall-iskejjel postsekondarji: “Juvenes Translatores”.

Il-Kummissjoni Ewropea tħabbar li Francesco Giorgino, student il-G.F. Abela Junior college tal-Imsida, huwa r‑rebbieħ Malti tat-18-il edizzjoni tal-konkors tat-traduzzjoni tal-UE għall-iskejjel postsekondarji “Juvenes Translatores”, bi traduzzjoni mill-Ingliż għall-Malti.

Barra minn hekk, erba’ studenti ngħataw rikonoxximent speċjali għat-traduzzjonijiet tagħhom. Dawn huma: Giulia Saliba (MT>EN) minn De La Salle Sixth Form, Christopher John Mercieca (EN>MT) u Shanel Cassar (EN>MT) minn St Aloysius Sixth Form, u Stefan Doandes (RO>EN) minn St Martin’s College Sixth Form.

Sitt skejjel postsekondarji minn Malta u Għawdex ħadu sehem fil-konkors tal-2024, il-massimu possibbli. Ħadu wkoll sehem studenti mill-kulleġġ MA Refalo f’Għawdex u Giovanni Curmi Higher Secondary School in-Naxxar.

Fl-2024 ħadu sehem 3070 parteċipant entużjast minn madwar l-UE. Huma kellhom jittraduċu test billi jagħżlu żewġ lingwi minn fost l-24 lingwa uffiċjali tal-UE.

Il-Kummissjoni Ewropea ħabbret is-27 rebbieħ  mill-pajjiżi kollha tal-UE f’xandira minn Brussell li ntweriet f’bosta skejjel madwar l-Ewropa.

Filwaqt li l-Ingliż huwa l-aktar lingwa prominenti, il-144 kombinament tal-lingwi magħżula mill-istudenti minn 713-il skola fis-27 Stat Membru kienu jinkludu wkoll il-pari tal-lingwi bħall-Pollakk u l-Portugiż, is-Sloven u d-Daniż, u r-Rumen u l-Finlandiż.

It-tradutturi tal-Kummissjoni Ewropea għażlu rebbieħ wieħed jew waħda għal kull pajjiż tal-UE. Barra minn hekk, 341 student irċevew rikonoxximent speċjali għax-xogħol impressjonanti tagħhom. Piotr Serafin, il-Kummissarju għall-Baġit, għall-Ġlieda kontra l-Frodi u għall-Amministrazzjoni Pubblika, feraħ lir-rebbieħa u rringrazzja wkoll lill-parteċipanti kollha u lill-għalliema tagħhom għall-entużjażmu li wrew. Huwa żied dan il-messaġġ dwar l-importanza tat-tagħlim tal-lingwi.

Iċ-ċerimonja tal-għoti tal-premjijiet se ssir fi Brussell, fl-10 ta’ April. Bħala parti mill-vjaġġ tagħhom, is-27 traduttur żagħżugħ se jiltaqgħu mat-tradutturi tal-Kummissjoni Ewropea u jaraw kif jaħdmu fuq il-post. Din l-esperjenza se tagħtihom ukoll opportunità unika biex jiskopru l-lingwi u l-kulturi ta’ xulxin. Kif qal ir-rebbieħ Żvediż tas-sena li għaddiet, Ivar Lasse: Bis-saħħa ta’ Juvenes Translatores, issa nemmen fil-“Proġett Ewropew”.

Sfond

Il-konkors Juvenes Translatores, iffinanzjat mill-programm Erasmus+, ilu mill-2007 jiġi organizzat kull sena mid-Direttorat Ġenerali għat-Traduzzjoni tal-Kummissjoni Ewropea bil-għan li jippromwovi t-traduzzjoni u l-multilingwiżmu. Dan il-konkors għamel differenza kbira fil-ħajja ta’ ħafna mill-parteċipanti u r-rebbieħa li ħadu sehem fih, u jagħti liż-żgħażagħ l-ewwel esperjenza tagħhom fl-istituzzjonijiet Ewropej. Uħud minn dawn iddeċidew li jibdew jistudjaw it-traduzzjoni fl-università, u wħud ingħaqdu mad-dipartiment tat-traduzzjoni tal-Kummissjoni Ewropea bħala trainees, jew saru tradutturi full-time.

L-għan tal-konkors Juvenes Translatores huwa li jippromwovi t-tagħlim tal-lingwi fl-iskejjel u li jagħti liż-żgħażagħ idea ta’ x’inhu x-xogħol ta’ traduttur. Il-kompetizzjoni hija miftuħa għall-istudenti ta’ 17-il sena fl-iskejjel postsekondarji, u ssir fl-istess ħin fl-iskejjel kollha magħżulin fl-UE.

Il-multilingwiżmu, u għaldaqstant it-traduzzjoni, ilu aspett integrali tal-UE minn mindu nħolqu l-Komunitajiet Ewropej. Dan ġie minqux fl-ewwel Regolament adottat fl-1958, li jiddetermina l-lingwi li għandhom jintużaw f’dik li kienet il-Komunità Ekonomika Ewropea. Minn dakinhar ’l hawn, l-għadd ta’ lingwi uffiċjali tal-UE żdied minn erbgħa għal 24, meta aktar pajjiżi saru membri tal-UE.

Ir-rebbieħa ta’ Juvenes Translatores 2024-2025:

* L-għadd ta’ skejjel li jieħdu sehem minn kull pajjiż tal-UE huwa ekwivalenti għall-għadd ta’ siġġijiet li l-pajjiż ikollu fil-Parlament Ewropew, u l-iskejjel jintgħażlu b’mod każwali bil-kompjuter.

Għal aktar informazzjoni

Sit web ta’ Juvenes Translatores

Instagram ta’ Juvenes Translatores

@translatores