Ħoss il-Malti 2026

Ejja Ħoss il-Malti magħna fil-21 ta' Frar!

Fil-21 ta’ Frar infakkru l-Jum Dinji tal-Lingwa Materna, u l-importanza tal-lingwi biex il-kultura u t-tradizzjonijiet ta’ post jingħaddew minn ġenerazzjoni għall-oħra, u ma tintilifx id-diversità lingwistika u kulturali li jġibu magħhom. Dan jgħodd wisq aktar għal lingwi li ma jitkellmuhomx ħafna nies, li xi wħud minnhom saħansitra qegħdin fil-periklu li jintilfu.

Il-kunċett ta’ Ħoss il-Malti huwa sempliċi iżda rivoluzzjonarju:  biex niċċelebraw dan il-jum, f'din is-serata, ma ndoqqu xejn ħlief mużika bil-Malti, ta' kull ġeneru, mill-imgħoddi sal-lum.

Bħala mistieden speċjali għar-raba’ edizzjoni ta’ Ħoss il-Malti se jkollna magħna lill-kantawtur Michael Azzopardi u l-grupp tiegħu Il-Klieb tal-Wulf, fl-ewwel kunċert tagħhom mit-tnedija tal-album il-ġdid "It-Tfal tax-Xemx" is-sena l-oħra. Azzopardi stabbilixxa ruħu bħala artist fl-2020 b’sensiela ta’ diski u vidjows li ġibdu l-attenzjoni tal-udjenza Maltija, u minn dak iż-żmien ħareġ l-EP “Pistola” (2021), u l-albums “Vaganza” (2023) u “Tfal tax-Xemx” (2025).

B'Ħoss il-Malti nisfidaw l-idea li hemm oqsma li fihom il-Malti mhux postu, u nuru li lsienna jista’ jesprimi kollox u kullimkien: mill-kċina, il-baħar u l-għalqa, sal-mużika, it-teatru u l-poeżija, sal-ogħla istituzzjonijiet Ewropej.

Fid-Direttorat Ġenerali għat-Traduzzjoni, ħoss il-Malti nafuh sew. Għal aktar minn 20 sena, ħdimna bl-ilsien Malti biex nesprimu firxa wiesgħa ta’ kunċetti fl-oqsma kollha li tmiss magħhom il-ħidma tal-Unjoni Ewropea. 
Jekk titħajjar titgħallem aktar dwar it-traduzzjoni fil-Kummissjoni Ewropea, mela għala ma tapplikax għal “Blue Book” Traineeship imħallas ta’ ħames xhur magħna? L-applikazzjonijiet għas-sessjoni ta’ Ottubru jiftħu fis-16 ta’ Marzu.

F’din l-attività se jkun hemm ukoll kopji ta’ l-aċċent, ir-rivista maħruġa mill-komunità lingwistika tal-Malti fi ħdan id-DĠT.

Ħoss il-Malti huwa attività tal-Jum Ewropew tal-Lingwi, imtellgħa mill-Uffiċċju tal-Lingwa fi ħdan ir-Rappreżentanza tal-Kummissjoni Ewropea flimkien ma' Storeroom, bl-appoġġ tal-programm Erasmus+.

Dħul: b'xejn