Intejbu l-Wikizzjunarju bil-Malti

Ir-riżorsi diġitali għall-Ilsien Malti jeħtieġu x-xogħol u l-attenzjoni, u mod wieħed li bih nistgħu ntejbu r-riżorsi online għal ilsienna huwa permezz tal-Wikizzjunarju. 

Il-Komunità Wikimedia Malta għaddejja b’ħidma biex torqom il-kollezzjoni ta’ kliem li jinsabu fil-Ġabra biex imbagħad jiġu impurtati fil-Wikidata. Eventwalment, dawn se jkunu jistgħu jiddaħħlu fil-Wikizzjunarju, li hija riżorsa aċċessibbli u qawwija li se ssaħħaħ il-preżenza diġitali tal-Malti u sservi ta’ għajnuna għal min juża l-Malti. 

F’din l-attività, se jkollna taħriġ mingħand Dr Marc Tanti mill-Università ta’ Malta u membri minn Wikimedia Community Malta dwar il-lessemi fil-kuntest tal-Wikidata. Wara t-taħriġ, se nagħmlu editatona li fiha se ntejbu l-Ġabra billi noħolqu lessemi fuq Wikidata biex eventwalment jinħoloq il-Wikizzjunarju bil-Malti. 

Tixtieq tkun parti mill-iżvilupp diġitali tal-Malti? 

Qegħdin infittxu nies b’għarfien tajjeb tal-Malti, li jafu jużaw il-kompjuter u li fuq kollox għandhom għal qalbhom il-Malti biex ikunu parti minn dan il-proġett. Nieħdu gost ħafna jekk magħna jkollna: 

• Studenti u gradwati tal-Malti
• Akkademiċi
• Qarrejja tal-provi tal-Malti
• Tradutturi
• Kittieba
• U nies li jixtiequ jgħinu bi kwalunkwe mod li jistgħu

L-attività se tkun waħda pjuttost informali fi spirtu ta’ ħbiberija u kollaborazzjoni.  Għall-editatona, se jkun hemm bżonn li l-parteċipanti jġibu l-kompjuter personali tagħhom. Kull min jiġi jkollu bżonn juri l-karta tal-identità mal-bieb. 

Huwa importanti wkoll li qabel l-attività, joħolqu kont tal-Wikipedija sabiex ikunu jistgħu jaħdmu. 

10:00-10:30 – Nibdew bil-mod 

10:30-12:00 - Daħla għad-dinja tal-Wiki u għodda oħra - Wikimedia Community Malta 

Intejbu l-Ġabra u noħolqu lessemi fuq Wikidata – Dr Marc Tanti, Università ta’ Malta 

12:00-13:00 – Waqfa għall-ikel (ipprovdut minn WCM għal min se jattendi l-Editatona biss)

13:00-15:30 – Editatona (ġib laptop miegħek)

Ġib miegħek karta tal-identità jew passaport għad-dħul f'dar l-Ewropa.