Il-pakkett tal-proċeduri ta’ ksur ta’ Ottubru: deċiżjonijiet ewlenin dwar l-enerġija

Fil-pakkett regolari tagħha ta’ deċiżjonijiet dwar il-ksur, il-Kummissjoni Ewropea tieħu azzjoni legali kontra l-Istati Membri talli naqsu milli jikkonformaw mal-obbligi tagħhom skont il-liġi tal-UE. Dawn id-deċiżjonijiet, li jkopru diversi setturi u oqsma ta’ politika tal-UE, għandhom l-għan li jiżguraw l-applikazzjoni xierqa tal-liġi tal-UE għall-benefiċċju taċ-ċittadini u tan-negozji.

Fil-lista ta’ ksur ta’ Ottubru, hemm 2 ittri ta’ intimazzjoni relatati mal-enerġija u ittri ta’ intimazzjoni addizzjonali, 5 opinjonijiet motivati u riferiment wieħed lill-Qorti tal-Ġustizzja. 

Ittri ta’ intimazzjoni u ittri ta’ intimazzjoni addizzjonali

Il-Kummissjoni tistieden lill-Belġju, lil Spanja u lil Franza jinnotifikaw il-Pjanijiet ta' Tħejjija għar-Riskji tal-elettriku tagħhom.  
Il-Kummissjoni Ewropea ddeċidiet li tiftaħ proċeduri ta' ksur billi bagħtet ittra ta' intimazzjoni lil Spanja (INFR(2026)2191) u lil Franza (INFR(2026)2192)) u ddeċidiet li tibgħat ittra ta' intimazzjoni addizzjonali lill-Belġju(INFR(2026)2036) rigward in-notifika nieqsa tal-pjan ta' tħejjija għar-riskji tagħhom f'konformità mar-Regolament (UE) 2019/941 dwar it-tħejjija għar-riskji fis-settur tal-elettriku. Il-pjan ta’ tħejjija għar-riskji huwa għodda importanti biex tiġi żgurata tħejjija massima fis-settur tal-elettriku u għandu jiġi stabbilit biex jiġi evitat tfixkil fil-provvista tal-elettriku jew jittaffew l-effetti tiegħu, jekk dan iseħħ. Hija għandha tistabbilixxi l-miżuri kollha li huma ppjanati jew meħuda għall-prevenzjoni, it-tħejjija u l-mitigazzjoni tal-kriżijiet tal-elettriku. Il-kriżijiet tal-elettriku jistgħu jseħħu għal ħafna raġunijiet, pereżempju minħabba kundizzjonijiet estremi tat-temp, attakki malizzjużi jew nuqqas ta’ fjuwil, fost l-oħrajn. Fejn iseħħu sitwazzjonijiet ta’ kriżi, dawn spiss ikollhom effett transfruntier. Inċidenti fuq skala kbira, bħal perjodi ta’ kesħa, mewġiet ta’ sħana jew attakki ċibernetiċi jistgħu jaffettwaw diversi pajjiżi tal-UE fl-istess ħin. Il-pjanijiet ta’ tħejjija għar-riskji huma bbażati fuq xenarji ta’ kriżi reġjonali u nazzjonali, li jiżguraw li f’każ ta’ kriżi, l-elettriku jiġi dirett lejn fejn ikun l-aktar meħtieġ. L-Istati Membri jeħtiġilhom jadottaw u jippubblikaw il-pjanijiet aġġornati tagħhom ta’ tħejjija għar-riskji kull erba’ snin, li jibdew mill-ewwel wieħed dovut sal-5 ta’ Jannar 2022. Il-Belġju, Franza u Spanja ma nnotifikawx il-pjan aġġornat tagħhom ta’ tħejjija għar-riskji mistenni sal-5 ta’ Jannar 2026. Il-Kummissjoni issa qed titlob lill-Belġju, lil Franza u lil Spanja biex jikkonformaw mar-Regolament mingħajr dewmien. Il-Belġju kien diġà naqas milli jinnotifika l-pjan ta’ tħejjija għar-riskji emendat preċedenti u milli jissottometti l-abbozz tal-pjan ta’ tħejjija għar-riskji għall-konsultazzjoni, li għalih irċieva ittra ta’ intimazzjoni f’Marzu 2026. L-Istati Membri għandhom xahrejn biex iwieġbu għall-ittra ta’ intimazzjoni. Fin-nuqqas ta’ tweġiba sodisfaċenti, il-Kummissjoni tista’ tiddeċiedi li toħroġ opinjoni motivata.   

Il-Kummissjoni tappella lir-Rumanija biex tiżgura konformità effettiva mar-regoli tal-UE dwar l-ekodisinn u t-tikkettar
tal-enerġija tal-prodotti. Il-Kummissjoni Ewropea ddeċidiet li tibgħat ittra ta' intimazzjoni addizzjonali lir-Rumanija (INFR(2025)2074) talli naqset milli tiżgura konformità effettiva mar-regoli tal-UE dwar l-ekodisinn u t-tikkettar tal-enerġija tal-prodotti. L-Istati Membri huma responsabbli biex jiżguraw sorveljanza effettiva tas-swieq tagħhom u biex jiżguraw li l-prodotti li jikkonformaw mar-regoli applikabbli kollha biss jitqiegħdu fis-suq. Fil-prattika, dan ifisser li jiġi vverifikat li l-prodotti jissodisfaw ir-rekwiżiti minimi tal-użu tal-enerġija stabbiliti skont ir-regolamenti dwar l-ekodisinn, u li l-prodott ikollu tikketta tal-enerġija korretta li tipprovdi lill-konsumaturi bl-informazzjoni li jeħtieġu għad-deċiżjonijiet tax-xiri. Il-Kummissjoni tqis li r-Rumanija ma ssodisfatx bis-sħiħ l-obbligi tagħha skont ir-Regolament dwar is-Sorveljanza tas-Suq (ir-Regolament(UE) 2019/1020) biex tiżgura sorveljanza effettiva tas-suq fir-rigward tar-regoli tal-UE dwar l-ekodisinn u t-tikkettar tal-enerġija tal-prodotti. Għalhekk, hija bagħtet ittra ta' intimazzjoni lir-Rumanija f'Lulju 2025. Għalkemm l-awtoritajiet Rumeni impenjaw ruħhom li jadottaw leġiżlazzjoni ġdida biex jaħtru l-awtoritajiet tas-sorveljanza tas-suq, dan għadu ma seħħx, u għalhekk il-Kummissjoni issa ddeċidiet li tibgħat ittra ta’ intimazzjoni addizzjonali biex tiċċara r-rekwiżiti legali ta’ dan l-aspett speċifiku tal-każ.  Issa r-Rumanija għandha xahrejn biex twieġeb u tieħu l-miżuri meħtieġa, inkella l-Kummissjoni tista’ tiddeċiedi li toħroġ opinjoni motivata.

Opinjonijiet motivati

Illum, il-Kummissjoni Ewropea ddeċidiet li tibgħat opinjoni motivata lill-Greċja (INFR(2025)0315), lil Spanja (INFR(2025)0319), lill-Italja (INFR(2025)0334 ), lilMalta (INFR(2025)0345)talli naqsu milli jittrasponu bis-sħiħ fid-dritt nazzjonali d-dispożizzjonijiet tad-Direttiva riformulata dwar l-Effiċjenza Enerġetika (id-Direttiva(UE) 2023/1791 ). Id-Direttiva riveduta ġiet adottata fl-2023, u tissostitwixxi d-Direttiva 2012/27/UE preċedenti. L-Istati Membri kellhom jinnotifikaw il-miżuri ta’ traspożizzjoni tagħhom sal-11 ta’ Ottubru 2025, ħlief għal xi dispożizzjonijiet speċifiċi li kellhom skadenzi speċifiċi. Id-Direttiva riformulata tintroduċi miżuri aktar ambizzjużi għall-effiċjenza enerġetika biex tgħin fit-tnaqqis tal-konsum ġenerali tal-enerġija fl-UE, u b’hekk tikkontribwixxi għall-ambizzjoni klimatika tal-UE u ttejjeb is-sigurtà u l-affordabbiltà tal-enerġija. Din tistabbilixxi miri għall-konsum tal-enerġija u l-iffrankar tal-enerġija, b’enfasi speċjali fuq miżuri biex jittaffa l-faqar enerġetiku, kif ukoll miri għall-konsum tal-awtoritajiet pubbliċi u r-rinnovazzjoni tal-bini li jkun proprjetà tal-awtoritajiet pubbliċi. Jintroduċi wkoll il-prinċipju “l-effiċjenza enerġetika tiġi l-ewwel” bħala prinċipju fundamentali tal-politika tal-enerġija tal-UE, li jirrikjedi li l-effiċjenza enerġetika tiġi kkunsidrata mill-pajjiżi tal-UE fid-deċiżjonijiet ta’ politika u ta’ investiment ewlenin rilevanti kollha meħuda fis-setturi tal-enerġija u mhux tal-enerġija. F’Novembru 2025, il-Kummissjoni bagħtet ittri ta’ intimazzjoni lil 26 Stat Membru talli naqsu milli jittrasponu bis-sħiħ id-Direttiva fil-liġi nazzjonali. Wara li eżaminat il-miżuri ta’ traspożizzjoni u l-ispjegazzjonijiet ipprovduti mill-Greċja, minn Spanja, mill-Italja u minn Malta, il-Kummissjoni kkonkludiet li dawn l-Istati Membri għadhom ma ttrasponewx id-Direttiva bis-sħiħ. Għalhekk, il-Kummissjoni ddeċidiet li toħroġ opinjonijiet motivati li jindikaw liema dispożizzjonijiet speċifiċi jitqiesu li ma ġewx trasposti. L-erba’ Stati Membri issa għandhom xahrejn biex iwieġbu u jlestu t-traspożizzjoni. Inkella, il-Kummissjoni tista’ tiddeċiedi li tressaq il-każ quddiem il-Qorti tal-Ġustizzja tal-Unjoni Ewropea b’talba biex timponi sanzjonijiet finanzjarji. 

Illum, il-Kummissjoni Ewropea ddeċidiet li tibgħat opinjoni motivata lill-Kroazja (INFR(2025)0222) talli naqset milli tittrasponi bis-sħiħ id-dispożizzjonijiet tad-Direttiva riveduta dwar l-Enerġija Rinnovabbli (id-Direttiva(UE) 2023/2413) koperta mit-tieni skadenza għat-traspożizzjoni tagħha fid-dritt nazzjonali. Id-Direttiva ġiet adottata fl-2023, u l-Istati Membri kellhom jinnotifikaw it-traspożizzjoni tagħha sal-21 ta’ Mejju 2025, ħlief għal xi dispożizzjonijiet relatati mal-permessi, li kienu diġà dovuti sal-1 ta’ Lulju 2024. Ir-regoli l-ġodda għandhom l-għan li jaċċelleraw l-użu tal-enerġija rinnovabbli fis-setturi kollha tal-ekonomija, mhux biss fis-settur tal-enerġija, iżda wkoll u speċjalment f'dawk is-setturi fejn il-progress huwa aktar diffiċli - pereżempju t-tisħin u t-tkessiħ, il-bini, it-trasport u l-industrija, fejn stabbilixxejna wkoll miri ġodda jew imsaħħa. Huma jistabbilixxu miżuri orizzontali u trażversali biex jippromwovu l-użu ta’ sorsi ta’ enerġija rinnovabbli, bħat-tisħiħ tal-garanziji tal-oriġini, l-iffaċilitar tal-integrazzjoni tas-sistema tal-enerġija permezz tal-promozzjoni tal-elettrifikazzjoni u l-idroġenu rinnovabbli, u salvagwardji biex tiġi żgurata produzzjoni tal-bijoenerġija aktar sostenibbli. L-implimentazzjoni tal-leġiżlazzjoni hija strumentali biex titħaffef l-introduzzjoni tal-enerġija nadifa domestika, biex ikomplu jitnaqqsu l-emissjonijiet ta' gassijiet serra (GHG) fis-settur tal-enerġija - li bħalissa jikkontribwixxi aktar minn 75 % tal-emissjonijiet totali ta' gassijiet serra fl-Unjoni-, u biex tissaħħaħ is-sigurtà tal-enerġija. Dan se jikkontribwixxi wkoll għat-tnaqqis tal-prezzijiet tal-enerġija u għat-tisħiħ tal-kompetittività tal-ekonomija tal-UE. F’Lulju 2025, il-Kummissjoni bagħtet ittri ta’ intimazzjoni lil 26 Stat Membru talli naqsu milli jittrasponu bis-sħiħ id-Direttiva fil-liġi nazzjonali. Wara li eżaminat il-miżuri ta’ traspożizzjoni u l-ispjegazzjonijiet ipprovduti mill-Kroazja, il-Kummissjoni kkonkludiet li l-Kroazja għadha ma ttrasponietx id-Direttiva bis-sħiħ. Għalhekk, il-Kummissjoni ddeċidiet li toħroġ opinjoni motivata lill-Kroazja li tindika liema dispożizzjonijiet huma kkunsidrati bħala mhux trasposti. Il-Kroazja issa għandha xahrejn biex twieġeb u tieħu l-miżuri meħtieġa. Inkella, il-Kummissjoni tista’ tiddeċiedi li tressaq il-każ quddiem il-Qorti tal-Ġustizzja tal-Unjoni Ewropea b’talba biex timponi sanzjonijiet finanzjarji.

Il-Kummissjoni tħeġġeġ lill-Polonja u lir-Rumanija jikkonformaw bis-sħiħ mar-regoli tal-UE dwar is-sikurezza tal-operazzjonijiet taż-żejt u tal-gass offshore
Illum, il-Kummissjoni Ewropea ddeċidiet li tibgħat opinjoni motivata lill-Polonja (INFR(2021)2151) u lir-Rumanija(INFR(2021)2150) li titlob liż-żewġ Stati Membri jikkonformaw bis-sħiħ mar-regoli tal-UE dwar is-sikurezza tal-operazzjonijiet taż-żejt u tal-gassoffshore (id-Direttiva2013/30/UE). Id-Direttiva għandha l-għan li tnaqqas l-okkorrenza ta’ aċċidenti kbar f’operazzjonijiet taż-żejt u tal-gass offshore u li tillimita l-konsegwenzi tagħhom għall-ħajja tal-bniedem, l-ambjent tal-baħar, u l-ekonomiji kostali. Il-Kummissjoni tqis li l-Polonja u r-Rumanija ma jissodisfawx bis-sħiħ xi wħud mill-obbligi tagħhom skont ir-regoli tal-UE biex jipprevjenu u jirrispondu għal aċċidenti fuq installazzjonijiet offshore għall-operazzjonijiet tal-gass u taż-żejt. Minħabba d-domanda għall-enerġija tal-UE, dawn l-operazzjonijiet lil hinn mill-kosta jgħinu biex tiġi żgurata provvista sigura tal-enerġija. Ir-regoli tal-UE dwar is-sikurezza offshore huma importanti minħabba li inċident f’pajjiż wieħed jista’ jikkawża ħsara ambjentali u ekonomika lill-ġirien tiegħu wkoll. Wara l-ittri ta' intimazzjoni f'Settembru 2021,, l-Istati Membri issa għandhom xahrejn biex iwieġbu u jindirizzaw in-nuqqasijiet identifikati mill-Kummissjoni. Fin-nuqqas ta’ tweġiba sodisfaċenti, il-Kummissjoni tista’ tiddeċiedi li tressaq lill-Polonja u lir-Rumanija quddiem il-Qorti tal-Ġustizzja tal-Unjoni Ewropea.

  
Illum, il-Kummissjoni Ewropea ddeċidiet li tibgħat opinjoni motivata lill-Belġju (INFR(2026)2014), liċ-Ċekja (INFR(2026)2016), lill-Irlanda (INFR(2026)2023), lill-Italja (INFR(2026)2024), lil-Lussemburgu (INFR(2026)2025), lill-Ungerija (INFR(2026)2022), lil Malta (INFR(2026)2027), lill-Polonja (INFR(2026)2029) u lis-Slovakkja(INFR(2026)2032) talli komplew jonqsu milli jippreżentaw l-abbozz tal-Pjan Nazzjonali għar-Rinnovazzjoni tal-Bini (NBRP) tagħhom lill-Kummissjoni sal-iskadenza tal-31 ta' Diċembru 2025. Dawn il-pjanijiet huma meħtieġa skont id-Direttiva dwar ir-Rendiment tal-Bini fl-Użu tal-Enerġija. Wara l-ittri ta’ intimazzjoni mibgħuta f’Marzu 2026 talli ma ppreżentawx l-abbozz tal-Pjan Nazzjonali ta’ Rinnovazzjoni tal-Bini (NBRP, National Building Renovation Plan) tagħhom lill-Kummissjoni sal-iskadenza tal-31 ta’ Diċembru 2025, dawn id-9 Stati Membri għadhom ma ppreżentawx l-abbozz tal-NBRP tagħhom. L-NBRPs huma għodda strateġika essenzjali għall-Istati Membri biex jittrasformaw l-istokk tal-bini tagħhom f’assi bi prestazzjoni għolja, effiċjenti fl-użu tal-enerġija u dekarbonizzat sal-2050. Billi joħolqu pipelines ta’ rinnovazzjoni prevedibbli u trajettorji ċari fit-tul, dawn il-pjanijiet se jirfdu l-implimentazzjoni sħiħa tad-Direttiva (UE) 2024/1275 riformulata dwar ir-rendiment tal-bini fl-użu tal-enerġija u jagħtu l-istabbiltà u l-prevedibbiltà meħtieġa tal-investiment. Dawn il-pjanijiet huma essenzjali biex jittejjeb ir-rendiment tal-bini fl-użu tal-enerġija u b’hekk jikkontribwixxu għall-indipendenza enerġetika, il-kompetittività, l-akkomodazzjoni affordabbli, kontijiet tal-enerġija aktar baxxi u kundizzjonijiet tal-għajxien imtejba. Għalhekk, is-sottomissjoni f’waqtha ta’ dawn l-abbozzi tal-Pjanijiet se tkun essenzjali biex nixprunaw l-isforzi kollettivi tagħna lejn il-bini tad-dekarbonizzazzjoni. Il-Kummissjoni issa qed titlob lill-Istati Membri kkonċernati jippreżentaw l-abbozzi tal-Pjanijiet tagħhom mingħajr aktar dewmien. Dawn l-Istati Membri issa għandhom xahrejn biex iwieġbu għall-opinjonijiet motivati u jippreżentaw l-abbozzi tal-NBRPs tagħhom jew il-Kummissjoni tista’ tiddeċiedi li tressaq il-każ quddiem il-Qorti tal-Ġustizzja tal-Unjoni Ewropea. 

Il-Kummissjoni tħeġġeġ lill-Awstrija u lir-Rumanija jissottomettu l-informazzjoni nieqsa fir-rapporti nazzjonali integrati tagħhom dwar l-enerġija u l-klima Illum il-Kummissjoni Ewropea ddeċidiet li tibgħat opinjoni motivata lill-Awstrija(INFR(2026)2034) u lir-Rumanija(INFR(2026)2033) li għadhom ma ssottomettewx l-informazzjoni kollha meħtieġa fir-rapporti nazzjonali integrati tagħhom ta' progress dwar l-enerġija u l-klima (NECPRs) li kienu dovuti sal-15 ta' Marzu 2025. Skont l-Artikolu 17 tar-Regolament dwar il-Governanza tal-Unjoni tal-Enerġija u tal-Azzjoni Klimatika (ir-Regolament(UE) 2018/1999), l-Istati Membri huma obbligati jirrapportaw kull sentejn lill-Kummissjoni dwar il-progress miksub lejn l-implimentazzjoni tal-pjanijiet nazzjonali integrati tagħhom għall-enerġija u l-klima (NECPs) permezz tal-NECPRs. Sal-15 ta’ Marzu 2025, l-Istati Membri kellhom jirrapportaw il-progress tagħhom lejn l-implimentazzjoni tal-NECPs tagħhom għall-perjodu 2021-2030, u b’mod partikolari lejn l-objettivi, il-miri u l-kontributi tagħhom fil-ħames dimensjonijiet tal-Unjoni tal-Enerġija (id-dekarbonizzazzjoni, l-effiċjenza enerġetika, is-suq intern tal-enerġija, is-sigurtà tal-enerġija, l-innovazzjoni fir-riċerka u l-kompetittività). Ir-rekwiżiti preċiżi tal-kontenut ta’ dawn ir-rapporti huma stabbiliti f’diversi Artikoli tar-Regolament (UE) 2018/1999 u f’direttivi settorjali. Is-sottomissjoni tal-NECPRs titqies kompluta meta l-informazzjoni kollha meħtieġa tiġi pprovduta bl-użu tal-Pjattaforma elettronika ddedikata. L-NECPRs huma kruċjali peress li juru kif il-gvernijiet nazzjonali qed jilħqu l-objettivi tagħhom dwar l-enerġija u l-klima espressi fil-pjanijiet nazzjonali integrati tagħhom dwar l-enerġija u l-klima. Huma jipprovdu trasparenza u jiżguraw responsabbiltà aħjar billi jagħmlu din l-informazzjoni pubblika u komparabbli bejn l-Istati Membri. Barra minn hekk, huma essenzjali għall-Kummissjoni biex issegwi l-progress tal-Unjoni lejn il-miri komuni tagħha. Minħabba li l-Awstrija u r-Rumanija ma kkonformawx ma’ dan l-obbligu u għadhom ma ppreżentawx l-informazzjoni kollha meħtieġa, wara l-ittri ta’ intimazzjoni mibgħuta f’Marzu 2026, il-Kummissjoni issa ddeċidiet li toħroġ opinjonijiet motivati lil dawn iż-żewġ Stati Membri. Dawn l-Istati Membri issa għandhom xahrejn biex iwieġbu u jieħdu l-miżuri meħtieġa. Inkella, il-Kummissjoni tista’ tiddeċiedi li tressaq każijiet quddiem il-Qorti tal-Ġustizzja tal-Unjoni Ewropea.

Tressiq quddiem il-Qorti tal-Ġustizzja

Il-Kummissjoni tiddeċiedi li tressaq lill-Ungerija quddiem il-Qorti tal-Ġustizzja tal-Unjoni Ewropea biex tiżgura l-konformità mar-regoli dwar l-arbitraġġ intra-UE bejn l-investituri u l-Istat Illum, il-KummissjoniEwropea tiddeċiedi li tressaq lill-Ungerija (INFR(2025)2204) quddiem il-Qorti tal-Ġustizzja tal-Unjoni Ewropea talli naqset milli tipprevjeni ksur tal-projbizzjoni fuq l-arbitraġġ intra-UE bejn l-investituri u l-Istat, kif stabbilit mill-ġurisprudenza tal-Qorti tal-Ġustizzja tal-Unjoni Ewropea. Fis-sentenza tagħha fil-Kawża C-741/19, (“is-sentenza Komstroy”), il-Qorti tal-Ġustizzja ddeċidiet li l-Artikoli 267 u 344 tat-TFUE jipprevjenu ftehim internazzjonali, bħall-Artikolu 26 tat-Trattat tal-Karta tal-Enerġija, milli tippermetti investitur minn Stat Membru wieħed iressaq tilwima dwar investimenti fi Stat Membru ieħor quddiem tribunal tal-arbitraġġ li dak l-Istat Membru jkun qabel li jaċċetta l-ġuriżdizzjoni tiegħu. Fil-fatt, l-Ungerija ppermettiet lill-kumpaniji kkontrollati mill-Istat jevitaw l-obbligi skont id-dritt tal-UE, inkluż dwar l-arbitraġġ bejn l-investitur u l-Istat Membru. MOL, kisret il-projbizzjoni tal-arbitraġġ intra-UE bejn l-investituri u l-Istat peress li MOL talbet lil qorti ta’ pajjiż terz tirrikonoxxi u tinforza deċiżjoni ta’ arbitraġġ intra-UE bejn l-investituri u l-Istat maħruġa favur tagħha abbażi tal-Artikolu 26 tat-Trattat tal-Karta tal-Enerġija. Il-Kummissjoni bagħtet ittra ta’ intimazzjoni lill-Ungerija f’Diċembru 2025, u l-Opinjoni motivata f’April 2026. Peress li l-Kummissjoni tqis li l-Ungerija għadha qed tikser ir-regoli tal-UE, iddeċidiet li tressaq il-każijiet quddiem il-Qorti tal-Ġustizzja tal-Unjoni Ewropea.  Aktar informazzjoni tinsab fl-istqarrija għall-istampa.

Il-Kummissjoni tiddeċiedi li tressaq lill-Bulgarija quddiem il-Qorti tal-Ġustizzja tal-Unjoni Ewropea talli naqset milli tittrasponi bis-sħiħ id-Direttiva dwar regoli komuni għas-suq intern għall-elettriku.
Illum, il-Kummissjoni Ewropea ddeċidiet li tressaq lill-Bulgarija(INFR(2021)0015) quddiem il-Qorti tal-Ġustizzja tal-Unjoni Ewropea (QĠUE) talli naqset milli tittrasponi bis-sħiħ id-Direttiva (UE) 2019/944 dwar regoli komuni għas-suq intern għall-elettriku, li temenda d-Direttiva 2012/27/UE. Id-Direttiva (UE) 2019/944 tistabbilixxi regoli ewlenin dwar l-organizzazzjoni u l-funzjonament tas-settur tal-elettriku tal-UE bil-ħsieb li jinħolqu swieq tal-elettriku integrati, kompetittivi, iċċentrati fuq il-konsumatur, flessibbli, ġusti u trasparenti madwar l-UE. Għandha wkoll l-għan li tiżgura livelli għoljin ta’ protezzjoni tal-konsumatur u li tippermetti lill-konsumaturi kollha jipparteċipaw b’mod attiv fis-suq tal-enerġija. L-iskadenza għall-Istati Membri biex jittrasponu d-Direttiva fil-liġi nazzjonali kienet il-31 ta’ Diċembru 2020. Fi Frar 2021, il-Kummissjoni bagħtet ittra ta’ intimazzjoni lill-Bulgarija. Sussegwentement bagħtet opinjoni motivata lill-Bulgarija f’April 2023, wara li kkonkludiet li mhux id-dispożizzjonijiet kollha tad-Direttiva kienu ġew trasposti fil-liġi nazzjonali. Wara li eżaminat it-tweġibiet ippreżentati mill-Bulgarija u l-miżuri nazzjonali ta’ traspożizzjoni nnotifikati, il-Kummissjoni tqis li l-Bulgarija għadha ma ttrasponietx bis-sħiħ id-Direttiva. Id-deċiżjoni hija parti mill-isforzi ta’ infurzar tal-Kummissjoni biex tneħħi l-ostakli fis-Suq Uniku fi 11-il qasam ta’ prijorità, kif imħabbar fil-Komunikazzjoni “Ġabra tar-Regoli tal-UE aktar sempliċi, aktar ċara u infurzata aħjar” (COM(2026) 380 final, l-AnnessII ). Għalhekk, il-Kummissjoni ddeċidiet li tressaq dan il-każ quddiem il-Qorti tal-Ġustizzja tal-Unjoni Ewropea b’talba għal sanzjonijiet finanzjarji. Aktar informazzjoni tinsab fl-istqarrija għall-istampa.

Għal aktar informazzjoni dwar il-proċedura ta' ksur tal-UE, ara l-istqarrija għall-istampa sħiħa u l-Mistoqsijiet u Tweġibiet;A. Għal aktar dettalji dwar l-istorja ta' każ, tista' tikkonsulta r-reġistru tad-deċiżjonijiet ta' ksur.