Il-pakkett tal-proċeduri ta' ksur ta' Marzu

Il-Kummissjoni tappella lill-Istati Membri biex jissottomettu l-abbozzi tal-pjanijiet nazzjonali ta' rinnovazzjoni tal-bini tagħhom dovuti skont id-Direttiva dwar ir-Rendiment tal-Bini fl-Użu tal-Enerġija

Il-Kummissjoni Ewropea ddeċidiet li tiftaħ proċeduri ta' ksur billi bagħtet ittra ta' intimazzjoni lill-Belġju (INFR(2026)2014), liċ-Ċekja (INFR(2026)2016), lill-Ġermanja (INFR(2026)2017), lill-Estonja (INFR(2026)2019), lill-Irlanda (INFR(2026)2023), lill-Ġreċja (INFR(2026)2020), lil Franza (INFR(2026)2021), lill-Italja (INFR(2026)2024), lil Ċipru (INFR(2026)2015), lil-Latvja (INFR(2026)2026), lil-Lussemburgu (INFR(2026)2025), lill-Ungerija (INFR(2026)2022), lil Malta (INFR(2026)2027), lin-Netherlands (INFR(2026)2028), lill-Awstrija (INFR(2026)2013), lill-Polonja (INFR(2026)2029), lill-Portugall (INFR(2026)2030), lis-Slovakkja (INFR(2026)2032) u lill-Iżvezja (INFR(2026)2031) għax naqsu milli jissottomettu l-abbozz tal-pjan nazzjonali ta' rinnovazzjoni tal-bini tagħhom (NBRP, National Building Renovation Plan) lill-Kummissjoni sal-iskadenza tal-31 ta' Diċembru 2025. L-NBRPs huma għodda essenzjali u strateġika biex sal-2050 l-Istati Membri jittrasformaw l-istokk tal-bini tagħhom f'assi dekarbonizzat, bi prestazzjoni għolja u effiċjenti fl-użu tal-enerġija. Bil-ħolqien ta' previżjonijiet ta' rinnovazzjoni prevedibbli u trajettorji ċari fit-tul, dawn il-pjanijiet se jirfdu l-implimentazzjoni sħiħa tad-Direttiva riformulata dwar ir-Rendiment tal-Bini fl-Użu tal-Enerġija (id-Direttiva (UE) 2024/1275) u jagħtu l-istabbiltà u l-prevedibbiltà tal-investiment meħtieġa. Dawn il-pjanijiet huma strumentali biex jittejjeb ir-rendiment tal-bini fl-użu tal-enerġija u b'hekk jikkontribwixxu għal kontijiet tal-enerġija orħos. Is-sottomissjoni f'waqtha tal-abbozzi tal-pjanijiet tippermetti lill-Kummissjoni tivvaluta b'mod effettiv l-istrateġija ta' kull Stat Membru, filwaqt li tiżgura li l-pjanijiet finalizzati jkunu komprensivi, fattibbli, u allinjati mal-miri nazzjonali u tal-UE aġġornati dwar il-klima u l-enerġija. Issa l-Kummissjoni qiegħda titlob lill-Istati Membri kkonċernati biex jissottomettu l-abbozzi tal-pjanijiet tagħhom mingħajr iktar dewmien. Dawn l-Istati Membri għandhom xahrejn biex iwieġbu għall-ittri ta' intimazzjoni. Fin-nuqqas ta' tweġiba sodisfaċenti, il-Kummissjoni tista' tiddeċiedi li toħroġ opinjoni motivata.