Mit-12 ta' Ottubru, l-Istati Membri se jibdew jintroduċu s-sistema diġitali l-ġdida tal-fruntieri tal-Ewropa, is-Sistema ta' Dħul/Ħruġ (Entry/Exit System, EES), bejn il-fruntieri esterni tagħhom. Minn din id-data, l-Istati Membri se jibdew jirreġistraw b'mod elettroniku d-data ta' ċittadini mhux tal-UE li jaqsmu l-fruntieri esterni tal-UE għal soġġorni qosra (90 jum fi kwalunkwe perjodu ta' 180 jum). Huma se jagħmlu dan progressivament, għal perjodu ta' sitt xhur.
Matul l-introduzzjoni progressiva, l-Istati Membri se jkunu jistgħu jiddeċiedu f'liema Punti ta' Qsim tal-Fruntiera se jibdew jużaw is-sistema u meta. Dan jippermetti lill-Istati Membri jibdew jibbenefikaw mis-sistema l-ġdida, filwaqt li jiżgura li l-awtoritajiet tal-fruntieri, l-industrija tat-trasport u l-vjaġġaturi jkunu jistgħu jaġġustaw għall-proċeduri l-ġodda.
Fi tmiem dan il-perjodu, l-EES se tintuża b'mod sħiħ fil-punti kollha ta' qsim tal-fruntiera u l-ittimbrar tal-passaport se jiġi sostitwit b'rekords elettroniċi fis-sistema. Dan se jipprovdi data affidabbli dwar il-qsim tal-fruntieri, jidentifika b'mod sistematiku lil dawk li jibqgħu fit-territorju wara l-iskadenza tal-awtorizzazzjoni għas-soġġorn kif ukoll każijiet ta' frodi tad-dokumenti u tal-identità.
Biż-żieda fl-użu tal-kontrolli awtomatizzati fil-fruntieri, l-ivvjaġġar se jsir aktar faċli u sikur għal kulħadd. F'dawk il-punti ta' qsim tal-fruntiera fejn tkun fis-seħħ l-EES, iċ-ċittadini mhux tal-UE se jkollhom id-data tal-passaport, id-data bijometrika (l-immaġni tal-wiċċ u l-marki tas-swaba') u d-data tad-dħul jew tal-ħruġ tagħhom irreġistrata fl-EES. Dan isir fl-ewwel dħul u fl-ewwel ħruġ; għal kull dħul u ħruġ sussegwenti, tkun meħtieġa biss verifika rapida. Xi pajjiżi jistgħu jiddeċiedu li jkomplu jawtomatizzaw il-proċessi tagħhom b'sistemi self-service. Is-sistema l-ġdida tissodisfa l-ogħla standards ta' protezzjoni tad-data u tal-privatezza, filwaqt li tiżgura li d-data personali tal-vjaġġaturi tibqa' protetta u sigura. L-ittimbrar tal-passaporti se jkompli matul il-perjodu ta' tranżizzjoni ta' sitt xhur.
Il-vjaġġaturi jistgħu jsibu informazzjoni u gwida aġġornati fuq is-sit web uffiċjali tal-EES: travel-europe.europa.eu/ees.
Il-passi li jmiss
L-EES se tiġi introdotta progressivament fuq perjodu ta' 6 xhur, sad-9 ta' April 2026. Mill-10 ta' April 2026, l-EES se tkun kompletament operattiva fil-punti kollha ta' qsim tal-fruntieri esterni u l-ittimbrar tal-passaporti se jiġi sostitwit b'rekords elettroniċi fis-sistema.
Matul ix-xhur li ġejjin, il-Kummissjoni Ewropea u l-eu-LISA (l-Aġenzija tal-Unjoni Ewropea għat-Tmexxija Operattiva tas-Sistemi tal-IT Fuq Skala Kbira) se jkomplu jappoġġaw lill-Istati Membri biex jiżguraw il-varar bla xkiel tas-sistema.
Kampanji ta' informazzjoni u attivitajiet ta' sensibilizzazzjoni fl-ajruporti u f'punti oħra ta' qsim tal-fruntieri u f'konsulati f'pajjiżi terzi għadhom għaddejjin u se jkomplu matul ix-xhur li ġejjin biex jiggwidaw lill-vjaġġaturi permezz tal-proċeduri l-ġodda.
Sfond
L-EES hija parti mill-pakkett tal-Fruntieri Intelliġenti tal-UE, li għandu l-għan li jtejjeb il-ġestjoni tal-fruntieri esterni tal-UE billi juża teknoloġija tal-ogħla livell u soluzzjonijiet innovattivi. Il-pakkett jinkludi l-EES, is-Sistema Ewropea ta' Informazzjoni u ta' Awtorizzazzjoni għall-Ivvjaġġar (ETIAS), u użu estiż u aktar armonizzat tas-sistemi ta' Kontroll Awtomatizzat tal-Fruntieri (ABC) użati mill-Istati Membri. Flimkien dawn is-sistemi se jiffaċilitaw esperjenza tal-ivvjaġġar aktar effiċjenti, sigura u konvenjenti għall-vjaġġaturi kollha lejn u mill-UE. Il-vjaġġaturi affettwati mir-regoli l-ġodda jistgħu, qabel ma jidħlu fiż-żona Schengen, jiksbu informazzjoni dwar il-proċeduri l-ġodda fuq is-sit web Official Travel Europe.
Għal aktar informazzjoni
Deċiżjoni ta' Implimentazzjoni tal-Kummissjoni li tiddetermina d-data minn meta s-Sistema ta' Dħul/Ħruġ għandha tibda topera
Is-sit web Uffiċjali Travel Europe
Sistema ta' Dħul/Ħruġ - Kummissjoni Ewropea
Dettalji
- Data tal-pubblikazzjoni
- 12 Ottubru 2025
- Awtur
- Ir-Rappreżentazzjoni f’Malta