Kapitali Ewropea tal-Kultura 2031: riżultati tal-preselezzjoni Maltija

Il-panel tal-preselezzjoni għall-Kapitali Ewropea tal-Kultura 2031 iltaqa’ fit-3 u l-4 ta’ Novembru fil-Valletta Design Cluster. Wara d-deliberazzjonijiet tiegħu, il-panel ta’ esperti indipendenti rrakkomanda li Victoria tgħaddi għall-istadju finali tal-kompetizzjoni.

Malta fetħet l-applikazzjonijiet fis-7 ta’ Ottubru 2024, u żewġ lokalitajiet daħħlu l-applikazzjonijiet tagħhom sal-iskadenza tal-25 ta’ Awwissu 2025. Jekk l-awtoritajiet Maltin japprovaw ir-rakkomandazzjoni tal-panel, il-lokalità magħżula se jkollha sas-sajf tal-2026 biex tippreżenta l-applikazzjoni finali tagħha. Il-panel imbagħad jerġa’ jiltaqa’ l-Belt Valletta f’Settembru 2026 biex jirrakkomanda liema belt Maltija għandu jkollha dan it-titlu. 

Il-Belt Valletta ġiet imħabbra bħala l-ewwel Kapitali Ewropea tal-Kultura Maltija għall-2018. Dik is-sena ħalliet il-wirt tagħha permezz ta’ postijiet kulturali ġodda bħall-Valletta Design Cluster u l-MUŻA, il-mużew nazzjonali tal-arti tal-komunità.

Il-Kummissarju għall-Ekwità Interġenerazzjonali, iż-Żgħażagħ, il-Kultura u l-Isport, Glenn Micallef qal:

“Il-proċess tal-Kapitali Ewropea tal-Kultura 2031 f’Malta daħal fil-fażi li jmiss. Il-belt li għaddiet għall-fażi li jmiss se jkollha l-opportunità tibni fuq il-wirt ta’ Valletta 2018 waqt li toħloq opportunitajiet ġodda għall-kooperazzjoni u l-iskambju kulturali madwar l-Ewropa. Il-kultura rikka u ħajja ta’ Malta u Għawdex hija xempju tad-diversità kulturali Ewropea. L-inizjattiva li ġejja tal-Boxxla Kulturali għall-Ewropa se tkompli ssaħħaħ ir-rwol tal-kultura fit-tfassil tal-politika tal-UE u l-inizjattiva tal-Kapitali Ewropea tal-Kultura. Nixtieq kull suċċess lil Victoria fl-istadju li jmiss tal-proċess.

Il-Kapitali Ewropea tal-Kultura tiċċelebra d-diversità, tinvolvi lill-komunitajiet, u trawwem l-iżvilupp kulturali u reġjonali qabel, waqt, u lil hinn mis-sena li l-belt ikollha t-titlu.

Aktar informazzjoni dwar l-evalwazzjoni tinsab hawn.

Fl-2031, Spanja wkoll se tospita Kapitali Ewropea tal-Kultura, u ċ-ċiklu tagħha ta’ preselezzjoni huwa skedat għal Frar 2026.